Madaxweynaha Cameroon, Paul Biya, ayaa mar kale dib loogu doortay xilka madaxweynenimo muddo siddeedaad ah, taas oo u oggolaanaysa inuu xafiiska sii joogo ilaa uu ku dhawaado da'da 100 sano jir, sida lagu sheegay natiijooyinka rasmiga ah ee Isniintii lagu dhawaaqay oo uu shaacisay Golaha Dastuuriga.

"Halkaan waxaa lagu dhawaaqayaa Madaxweynaha la doortay: musharraxa Biya Paul," ayuu yiri Clement Atangana, oo ah guddoomiyaha Golaha Dastuuriga.

Sida uu sheegay Golaha, Biya oo 92 jir ah isla markaana xilka hayay muddo 43 sano ah, ayaa helay 53.66% codadka, isagoo ka adkaaday musharraxiisa ugu weyn ee Issa Tchiroma Bakary, oo horey u soo noqday wasiir, kaas oo kaalinta labaad galay isagoo helay 39.19% codadka.

Si kastaba ha ahaatee, Tchiroma ayaa ku adkeysanaya inuu isagu ku guuleystay doorashadii dhacday 12-kii Oktoobar. Taageerayaashiisa ayaa ka jawaabay baaqiisa dibadbax, iyagoo Axaddii isugu soo baxay magaalada ugu weyn dalka ee Doula, taas oo keentay isku dhac dhexmaray iyaga iyo ciidamada ammaanka, halkaas oo ugu yaraan afar qof oo rayid ah ay ku dhinteen.

Biya, oo 92 jir ah, ayaa xilka qabtay sanadkii 1982, tan iyo markaasna wuxuu si adag ugu sii haystay awoodda, isagoo sanadkii 2008 meesha ka saaray xaddidaadda muddada xilka madaxweynaha, isla markaana marar badan dib loogu doortay codad badan oo uu ku guuleystay.