Shirkii Hoggaanka Ciidamada Dhulka ee Afrika ayaa lagu soo gabagabeeyay magaalada Kigali ee dalka Rwanda. Soomaaliya waxaa shirka ku matalay wafdi uu hoggaaminayay Taliyaha Ciidanka Dhulka Soomaaliyeed, Sarreeye Guuto Sahal Cabdullaahi Cumar.
Ka-qaybgalayaashu waxay isku raaceen muhiimadda ay leedahay xoojinta iskaashiga iyo xiriirka milatari ee dalalka Afrika. Mid ka mid ah natiijooyinka ugu waaweyn ee shirka ayaa ahaa in la kordhiyo is-weydaarsiga khibradaha iyo hababka ugu wanaagsan, gaar ahaan kuwa la xiriira ka hortagga halista ay keenaan diyaaradaha aan duuliyaha lahayn (UAVs).
Sidoo kale, waxaa lagu heshiiyay in shirarkan la qabto si joogto ah, si loo xoojiyo wada-shaqeynta amni iyo difaac ee qaaradda oo dhan. Shirku wuxuu Soomaaliya u noqday fursad muhiim ah oo lagu sii adkeynayo iskaashiga amniga ee ay la leedahay dalalka gobolka.
