Madaxweynaha Turkiga Recep Tayyip Erdogan ayaa Khamiistii magaalada Masqad ee caasimadda Cumaan kula kulmay Suldaan Haitham bin Tariq, si loo xoojiyo iskaashiga labada dal ee dhinacyada warshadaha, difaaca, iyo isgaarsiinta.

Labada hoggaamiye ayaa ka wada hadlay arrimaha gobolka iyo kuwa caalamiga ah, iyagoo mar kale muujiyay midnimadooda ku aaddan qadiyadda Falastiin. Kulankan wuxuu ahaa joogsiga ugu dambeeya ee booqashada Erdogan ee saddexda waddan ee Khaliijka, kadib socdaallo uu ku tagay Kuwait iyo Qatar.

Kulanka Khamiistii ayaa ka dhacay Qasriga Al Alam ee magaalada Muscat, caasimadda Cumaan, waxaana lagu qabtay albaabada xiran, sida ay sheegeen ilo diblomaasiyadeed oo Turki ah.

Bayaan kasoo baxay Agaasinka Isgaarsiinta ee Turkiga ayaa lagu sheegay in labada hoggaamiye ay ka wada hadleen xiriirka labada dal iyo arrimaha gobolka iyo kuwa caalamiga ah.

“Madaxweyne Erdogan wuxuu sheegay in Turkiga iyo Cumaan ay wadaagaan xiriir taariikhi ah oo qoto dheer iyo walaalnimo, wuxuuna xusay in booqashadan ay sii xoojisay midnimada labada dal,” ayaa lagu yiri bayaanka.

“Madaxweyne Erdogan wuxuu carabka ku adkeeyay in iskaashiga lala yeelanayo Cumaan lagu ballaarin doono dhinacyo badan, laga bilaabo warshadaha iyo dhaqaalaha ilaa difaaca iyo isgaarsiinta,” ayuu bayaanku intaas ku daray.

“Isagoo xusay in Turkiga iyo Cumaan ay mowqifyo isku mid ah ka qabaan arrimo badan, gaar ahaan qadiyadda Falastiin, Madaxweyne Erdogan wuxuu uga mahadceliyay Cumaan dadaalladeeda ku saleysan dhexdhexaadinta iyo wadahadalka ee gobolka, wuxuuna intaas ku daray in la sameyn doono dadaallo wadajir ah si loo gaaro xal laba dowladood ah oo ku saabsan Gaza,” ayaa lagu yiri bayaanka.

Agaasinka ayaa sidoo kale sheegay in 16 dukumenti oo cusub la saxiixay intii uu socday kulanka labada dal.