Hay’adda Oxfam France ayaa sheegtay in in ka badan 21 milyan oo qof oo ku nool Jamhuuriyadda Dimuqraadiga ee Congo (DRC) ay u baahan yihiin gargaar bani’aadantinimo, taas oo ka dhigan ku dhowaad shantii qofba hal qof.
Oxfam waxay sheegtay in dalkaasi uu wajahayo “mid ka mid ah musiibooyinka bani’aadantinimo ee ugu halista badan uguna la illoobay caalamka,” isla markaana xaaladdu ay sii xumaanayso.
Crisis-ka ugu daran ayaa ka jira bariga dalka, oo ah meel hodan ku ah kheyraadka dabiiciga ah balse dagaallo sokeeye ay halakeeyeen muddo soddon sano ah. Colaadda ayaa sii xoogeysatay horraantii sanadkan markii kooxda hubeysan ee M23, oo ay taageerto dalka deriska ah ee Rwanda, ay si degdeg ah u qabsatay magaalooyinka waaweyn ee Goma iyo Bukavu.
In ka badan 1.6 milyan oo qof ayaa barakacay sannadkan, taas oo tirada guud ee dadka gudaha ku barakacay gaarsiisay 5.2 milyan, tiradaas oo ah tan labaad ee ugu badan caalamka kadib Suudaan.
Cunto yari daran ayaa ka jirta dalka, iyadoo 28 milyan oo qof ay la ildaran yihiin gaajo, halka adeegyada caafimaadka ay daalayaan iyo kaabayaasha oo burburay. Oxfam ayaa sidoo kale sheegtay in kufsiga haweenka uu gaaray heer argagax leh, iyadoo “hal haweeney la kufsado afartii daqiiqo mar.”
Inkasta oo xaaladdu degdeg tahay, haddana gargaarka caalamiga ah ayaa hoos u dhacay, iyadoo Oxfam ay sheegtay in hal sano gudihiis maalgelinta gargaarka muhiimka ah ay hoos u dhacday laba meelood meel.
Hay’addu waxay ugu baaqday shir caalami ah oo lagu qabanayo Faransiiska 30-ka Oktoobar, kaas oo looga hadlayo xaaladda gobolka Harooyinka Waaweyn ee Afrika, inuu “ka gudbo hadal iyo ballan-qaad keliya” oo uu keeno tallaabooyin wax ku ool ah.
Shirkan ayaa lagu wadaa inuu taageero dadaallada Qadar iyo Mareykanka ee lagu dhexdhexaadinayo dowladda DRC iyo kooxda M23. Oxfam waxay xustay in 70% gargaarka DRC uu sanadkii hore ka yimid Mareykanka, halka Faransiiska uu bixiyay kaliya 0.5% baahiyaha bani’aadantinimo ee dalkaas.
