Shan iyo toban dal oo ay ku jiraan Turkiga, dalalka Jaamacadda Carabta iyo Ururka Iskaashiga Islaamka (OIC), ayaa si adag u cambaareeyay ansixinta Israa’iil ee laba hindise sharciyeed oo lagu sheegayo in lagu fidinayo “madax-bannaanida Israa’iil” ee Daanta Galbeed ee la haysto.

Bayaanka wadajirka ah, oo ay soo saareen dalalka Turkiga, Sucuudi Carabiya, Urdun, Indoneesiya, Pakistan, Jabuuti, Cumaan, Gambia, Falastiin, Qadar, Kuwait, Liibiya, Malaysia, Masar, Nigeria, ururrada Jaamacadda Carabta iyo OIC, ayaa ku tilmaamay go’aanka Israa’iil mid si cad u jebinaya sharciga caalamiga ah iyo go’aanka Golaha Ammaanka ee QM lambarkiisu yahay 2334, kaas oo ka digaya tallaabo kasta oo Israa’iil ku beddesho qaabka, tirada dadka iyo xaaladda dhulka Falastiin ee la haysto tan iyo 1967-dii, oo ay ku jirto Bariga Qudus.

Bayaanka ayaa sidoo kale xusay in go’aanka Israa’iil uu ka hor imanayo talada Maxkamadda Caalamiga ah ee Caddaaladda (ICJ) oo caddaysay in qabsashada Israa’iil sharci-darro tahay isla markaana aan wax sharci ah u siinayn dhisidda iyo fidinta deegaannada gumeysiga.

Bayaanka ayaa soo dhoweeyay taladii ICJ ee ku saabsan derbiga Israa’iil ka dhistay dhulka Falastiin ee la haysto iyo waajibaadka caalamiga ah ee ka dhasha. Maxkamaddu waxay ku adkaysay in Israa’iil looga baahan yahay inay hubiso helitaanka adeegyada aasaasiga ah ee dadka Falastiin, gaar ahaan Qaza, iyo in la fududeeyo gargaarka bani’aadantinimo, gaar ahaan kan ay hogaamiso hay’adda UNRWA.

Sidoo kale, maxkamaddu waxay xusuusisay Israa’iil waajibaadkeeda ah inaysan gaajada u adeegsan xeelad dagaal, iyadoo tixraacaysa xannibaadaha ay saartay gargaarka Qaza. Waxa kale oo lagu celiyay mamnuucidda barakicinta iyo masaafurinta khasabka ah ee dadka.

ICJ ayaa mar kale xaqiijisay xuquuqda dadka Falastiin ee ismaamulidda iyo dhisashada dowlad madax-bannaan, iyadoo ku celisay in sheegashada Israa’iil ee Bariga Qudus ay tahay “waxba kama jiraan.”

Bayaanka ayaa sidoo kale cambaareeyay hindise sharciyeedka Israa’iil ee howlaha UNRWA looga mamnuucayo gudaha dhulalka ay sheegato, oo ay ku jirto Bariga Qudus, isagoo ku baaqay in beesha caalamka ay qaadato masuuliyaddeeda sharciga iyo midda akhlaaqiga ah si loo joojiyo tallaabooyinka sharci-darrada ah ee Israa’iil.

Ugu dambayn, dalalka saxiixay bayaanka ayaa ku adkeeyay taageeradooda xuquuqda sharciga ah ee dadka Falastiin u leeyihiin inay dhistaan dowlad madax-bannaan oo ku saleysan xuduudihii 4-tii Juun 1967, Bariga Qudusna ay tahay caasimaddeeda, taas oo ay ku tilmaameen waddada kaliya ee lagu heli karo nabad caddaalad ah iyo xasillooni waarta oo ka dhalata gobolka.