Baarlamaanka Federaalka Soomaaliya ayaa Isniintii si rasmi ah u ansixiyay Heshiiska Aaga Ganacsiga Xorta ah ee Qaaradda Afrika (AfCFTA), taasoo ah tallaabo taariikhi ah oo loo qaaday dhanka isku-dhafka dhaqaalaha ee qaranka.
Kulanka lixaad ee Kalfadhiga toddobaad ee Golaha Shacabka ayaa waxaa guddoominayay Guddoomiyaha Baarlamaanka, Sheekh Aadan Maxamed Nuur (Madoobe), oo ay weheliso Guddoomiye ku-xigeenka Koowaad, Sacdiya Yaasiin Xaaji Samatar, iyadoo kulanka ay kasoo qeyb galeen 146 xildhibaan.
Ajendaha kulanka ayaa ku saabsanaa akhrinta saddexaad iyo codbixinta heshiiska AfCFTA, kaas oo Golaha ay u soo gudbiyeen Wasaaradda Ganacsiga iyo Warshadaha, iyo Guddiga Arrimaha Dibadda iyo Iskaashiga Caalamiga ah ee Baarlamaanka.
Kadib codbixinta, Guddoomiyaha Baarlamaanka Sheekh Aadan Madoobe ayaa ku dhawaaqay natiijada: 145 xildhibaan oo u codeeyay heshiiska, 1 xildhibaan oo diiday, halka aysan jirin cid ka aamustay.
Ansixinta heshiiskan ayaa ah tallaabo muhiim ah oo si rasmi ah Soomaaliya ugu darsaysa Suuqa Ganacsiga Xorta ah ee ugu ballaaran dunida, taas oo fureysa fursado cusub oo suuq-gal iyo koboc dhaqaale.
Sidoo kale, kulanka ayaa lagu qaybiyay warbixinno ku saabsan akhrinta labaad ee laba hindise-sharciyeed oo muhiim ah oo kala ah: Sharciga Nidaamka Lacag-Bixinta Qaranka iyo dib-u-eegista Sharciga Ka-hortagga Burcad-badeedda iyo Afduubka (Sharciga No. 36 ee 30-ka Abriil, 1975).
