Hay’adda Sirdoonka iyo Nabad Sugidda Qaranka (NISA), ayaa habeenkii Isniinta fulisay howlgal amni oo qorshaysan oo ka dhacay deegaanka Kuukaayle ee hoos taga degmada Maxaas, gobolka Hiiraan.
Howlgalkan ayaa lagu bartilmaameedsaday goobo ay ku dhuumaaleysanayeen dagaalyahannada Al-Shabaab. Sida lagu sheegay bayaan ka soo baxay NISA, toddobo ka tirsan kooxdan ayaa lagu dilay, halka gaadiid dagaal iyo hoy ay ku jireenna la burburiyay.
Bayaanka ayaa sheegay in howlgalka uu ku dhacay saddex marxaladood: marxaladda hore ciidamada amnigu waxay duqeeyeen teendho ay ku jireen saddex dagaalyahan oo la dilay; daqiiqado kadibna duqeyn kale ayaa lagu dilay afar kale. Marxaladdii ugu dambeysay ayaa lagu burburiyay gaadiid dagaal oo kooxda u diyaarsanaa weerarro cusub.
NISA ayaa sheegtay in howlgalka lagu bilaabay xog sirdoon oo la xaqiijiyay taasoo muujisay dhaqdhaqaaqyo ay kooxda ku lahayd deegaanka Kuukaayle. Hay’addu waxay ku guuleysatay inay fashiliso qorshayaal kooxda u dhignayd weerarro ka dhan ah shacabka iyo ciidamada amniga.
Hay’addu waxay mar kale ku celisay go’aankeeda adag ee ah inay sii waddo bartilmaameedka Al-Shabaab (Khawaarij) meel kasta oo ay joogaan, iyadoo ka go’an ilaalinta shacabka Soomaaliyeed.
“Howlgalka si guul leh ayuu u soo dhammaaday, waxaana NISA ka go’an inay sii waddo burburinta shabakadaha khatarta ku haya qaranka,” ayaa lagu yiri bayaanka.
