Guddoomiye Ku-xigeenka Labaad ee Golaha Shacabka ee Baarlamaanka Federaalka Soomaaliya, Cabdullaahi Cumar Abshirow, oo hoggaaminaya wafdi ka kooban xubno ka socda labada aqal oo ka qeybgalaya shirka 151-aad ee Ururka Baarlamaanada Caalamka (IPU) oo ka dhacay magaalada Geneva ee dalka Switzerland.
Shirkan sannadkan ayaa diiradda saaraya arrimo muhiim ah oo ay ka mid yihiin ilaalinta xuquuqda aadanaha iyo taageeridda dadaallada bani’aadantinimo xilli ay dunidu wajahayso dhibaato iyo qalalaase caalami ah. Inta uu socdo shirka, wafdiyada ka kala socda dalalka xubnaha ah ayaa isweydaarsan doona aragtiyo iyo talooyin ku saabsan xalalka waxtarka leh ee lagu xoojin karo arrimahan.
Guddoomiye Ku-xigeenka Baarlamaanka Soomaaliya, Cabdullaahi Cumar Abshirow, ayaa lagu wadaa inuu khudbad ka jeediyo shirka, isaga oo ka hadli doona xaaladda guud ee Soomaaliya, guulihii ugu dambeeyay ee dowladdu ka gaartay amniga iyo dagaalka lagula jiro argagixisada, iyo sidoo kale mowduuca guud ee shirka ee sannadkan.
