Sanduuqa Lacagta Adduunka (IMF) ayaa soo saaray dib-u-eegistii afraad ee barnaamijka iskaashiga ee ay la leedahay dowladda Soomaaliya, kadib laba toddobaad oo kulammo ay dhexmareen masuuliyiinta dowladda iyo khubaro ka socday IMF, kuwaas oo ay hogaaminayeen Wasaaradda Maaliyadda iyo wakiillo sare oo IMF ah, iyadoo kormeerka guud uu lahaa Ran Bi, wakiilka joogtada ah ee IMF ee Soomaaliya.
Warbixinta, oo uu ansixiyay Golaha Fulinta ee IMF, ayaa muujisay in kulammadii ka dhacay magaalada Nairobi intii u dhaxaysay 16-kii Sebteembar ilaa 8-dii Oktoobar 2025 ay soo saareen natiijooyin muuqda oo taageeraya dib-u-habeynta dhaqaalaha dalka.
Wasiirka Maaliyadda Soomaaliya, Biixi Iimaan Cige, ayaa soo dhoweeyay warbixinta, isagoo sheegay inay ka tarjumayso dadaalladii waaweynaa ee dowladda ku bixisay hirgelinta isbeddellada dhaqaale, wuxuuna xusay in dowladda ay sii wado xoojinta dhaqaalaha Soomaaliya, kaas oo uu sheegay inuu gaaray meel wanaagsan.
Dib-u-eegistan ayaa timid kadib qiimayn ballaaran oo lagu sameeyay siyaasadaha maaliyadeed iyo isbeddellada qaab-dhismeedka ee ay dowladdu hirgelisay, kuwaas oo lagu doonayo in lagu taageero xasilloonida dhaqaalaha iyo koboca waara.
