Madaxweyne Donald Trump ayaa Aqalka Cad ku soo dhaweeyay Madaxweynaha Turkiga Recep Tayyip Erdogan, isaga oo ku tilmaamay “nin si weyn loo ixtiraamo” oo laga qadariyo Turkiga, Yurub iyo “dunida oo dhan.”
Kulanka ka dhacay xafiiska Oval-ka Khamiistii, oo ay ku xigtay casho-shaqo oo lagu qabtay qolka Golaha Wasiirrada, ayaa yimid xilli xasaasi ah oo ay wajaheen labada xulafee NATO.
Trump ayaa sheegay in wadahadalladu diiradda saari doonaan iibka hubka, oo ay ku jiraan diyaaradaha dagaalka F-16 iyo F-35 ee Mareykanka oo Turkigu rabo inuu iibsado.
“Waxay rabaan inay iibsadaan F-16, F-35 iyo waxyaabo kale, annaguna waan kala hadli doonnaa,” ayuu yiri Trump. “Waxaan filayaa inaan yeelan doono dhowr saacadood oo xiiso leh, waxaana rajaynayaa inaan wax badan qabanno.”
'Hannaan ka duwan kii hore' oo dhanka xiriirka ah
Madaxweyne Recep Tayyip Erdogan ayaa ku celiyay in xiriirka Turkiga iyo Mareykanka uu galay wajiyo cusub intii lagu jiray labadii xilli-hoggaamineed ee Trump.
Sannadkii 2020, Mareykanku wuxuu cunaqabatayn ku soo rogay waaxda difaaca Turkiga kadib markii Ankara ay iibsaday gantaallo Ruushka laga sameeyay, balse Trump ayaa muujiyay in xayiraadahaas la qaadi karo dhowaan. “Haddii kulankeenna uu fiican yahay, si degdeg ahba waa dhici kartaa,” ayuu yiri Trump. Wuxuu intaas ku daray in Erdogan uu kaalin ku lahaa go’aankiisa hore ee lagu qaaday cunaqabateyn adag oo lagu saaray Suuriya.
Ganacsi iyo iskaashi goboleed
Trump ayaa carrabka ku adkeeyay muhiimadda ballaarinta xiriirka ganacsi, isagoo sheegay: “Waxaan sameyn doonnaa heshiisyo ganacsi oo weyn oo faa’iido u leh labada dal.”
Wuxuu sidoo kale sheegay inuu Erdogan kala hadli doono arrimo waaweyn oo ay ku jiraan khilaafaadka gobolka, iibka hubka iyo iskaashiga dhaqaalaha.
Dhanka siyaasadda dibadda, Trump ayaa ku ammaanay Erdogan mowqifkiisa ku aaddan dagaalka Ruushka iyo Ukraine oo uu ku tilmaamay “mid dhexdhexaad ah,” isagoo xusay in madaxweynaha Turkiga lagu ixtiraamo labadaba Vladimir Putin iyo Volodymyr Zelenskyy.
Kulanka labada hoggaamiye, oo markii hore loogu talagalay 30 daqiiqo, ayaa la filayay inuu kusii dheeraado, taasoo muujinaysa culayska iyo muhiimadda arrimaha miiska saaran.
