Madaxa Hay'adda Sirdoonka Qaranka ee Turkiga (MIT), Ibrahim Kalin, ayaa Arbacadii magaalada Dimishiq ee caasimadda Suuriya kula kulmay Madaxweynaha Suuriya, Axmed al Sharaa, sida ay warisay Wakaaladda Wararka Suuriya (SANA).
Kulanka ayaa looga hadlay xiisadaha ka taagan gobolka iyo halka uu marayo heshiiskii lala galay hoggaanka SDF ee dhacay 10-kii Maarso, 2025, iyadoo la adkeeyay muhiimadda ay leedahay midnimada dhuleed, madaxbannaanida, iyo xasiloonida siyaasadeed ee Suuriya.
Turkiga wuxuu si dhow ula socdaa habraaca socda ee isku-dhafka ciidamada SDF ee uu Maraykanku taageero, uuna ku xooggan yahay ururka YPG, ee lagu biirinayo ciidanka Suuriya, sida ay bishii Luulyo sheegtay Wasaaradda Difaaca Qaranka ee Turkiga. Afhayeenka wasaaradda, Zeki Akturk, ayaa sheegay in la filayo in habraaca isku-dhafka la soo gabagabeeyo dhammaadka sannadka 2025.
10-kii Maarso, madaxtooyada Suuriya waxay ku dhawaaqday saxiixa heshiis lagu mideynayo SDF iyo hay'adaha dawladda, kaas oo lagu xoojinayo midnimada dhuleed ee dalka laguna diidayo iskuday kasta oo lagu doonayo in lagu kala qaybiyo.
Hase yeeshee, bilo kadib, Madaxweyne Axmed al Sharaa wuxuu qiray inay jiraan iska-hor-imaadyo u dhexeeya hadallada ay Ciidamada Dimuqraadiga Suuriya (SDF) ka sheegaan fagaarayaasha iyo ficilladooda ku aaddan hirgelinta heshiiskii 10-kii Maarso.
Ciidamada SDF, oo gargaar militari oo ballaaran, taageero maaliyadeed, iyo tababar ciidan ka helay Maraykanka iyagoo marmarsiiyo ka dhiganaya la-dagaallanka ururka Daacish ee dalka Suuriya, waxaa si buuxda u maamula YPG, oo ah faraca Suuriya ee ururka PKK, kaas oo ah urur loo aqoonsaday inuu yahay argagixiso.
