Madaxweynaha Turkiga Recep Tayyip Erdogan ayaa Guriga Turkiga (Turkevi) ee New York kula kulmay Madaxweynaha Suuriya Ahmed al-Sharaa intii lagu guda jiray shir-madaxeedka 80-aad ee Qaramada Midoobay.
Sida laga soo xigtay bayaan Arbacadii ka soo baxay Xafiiska Isgaarsiinta ee Turkiga, kulanka ayaa diiradda lagu saaray xiriirka labada dal ee Suuriya iyo arrimaha gobolka.
Kulanka waxaa sidoo kale ka qeyb galay Wasiirka Arrimaha Dibadda ee Suuriya Asaad al Shaibani iyo Madaxa Sirdoonka Turkiga Ibrahim Kalin.
Madaxweyne Erdogan ayaa sheegay in Turkigu rajeynayo in sida ugu dhaqsaha badan Suuriya looga qaado dhammaan cunaqabateynta, isla markaana uu taageerayo dadaal kasta oo ixtiraamaya madaxbannaanida iyo midnimada dhuleed ee Suuriya.
Wuxuu sidoo kale sheegay in SDF ay tahay inay u hoggaansanto heshiiskii 10-kii Maarso, isagoo intaas ku daray in Turkigu si dhow ula socdo horumarka ka socda gobolka, isla markaana taageerada Suuriya ay sii kordhi doonto.
Bishii Maarso 10-keedii, madaxtooyada Suuriya ayaa ku dhawaaqday heshiis lagu darayo SDF hay’adaha dowladda, iyadoo la adkeynayo midnimada dhuleed ee dalka iyo diidmada qorshe kasta oo kala goyn ah.
Bashar al-Assad, oo ahaa hoggaamiyaha Suuriya muddo ku dhow 25 sano, ayaa u cararay Ruushka bishii Diseembar ee sannadkii hore, taasoo soo afjartay xukunkii xisbiga Bacath oo talada hayay tan iyo 1963-kii.
Maamulka ku-meel-gaarka ah ee cusub ee al-Sharaa ayaa la yagleelay bishii Janaayo 2025.
Madaxweynaha Turkiga ayaa ku sugan New York si uu uga qeyb galo shir-madaxeedka 80-aad ee Qaramada Midoobay, isagoo sii wada kulamadiisa diblomaasiyadeed.
