Madaxweynaha Turkiga Recep Tayyip Erdogan ayaa sheegay in Turkigu uu sii wado gaarsiinta gargaarka bini’aadantinimo ee Qaza inkastoo ay jiraan "carqalado kala duwan oo ay sababtay Israa’iil" wuxuuna ka digay in amniga gobolku uu halis ku jiro inta uu sii jiro gumeysiga Falastiin.
Isagoo Isniintii ka hadlayey kulankii Golaha Wasiirada ee Ankara, Erdogan wuxuu adkeeyay inaysan jirin dal aamin ah gobolkan inta dhiigga Falastiiniyiintu daadanayo dhulkoodana la boobayo.
Markabkii 18-aad ee "Markabka Wanaagga" ee hay'adda Gargaarka Bisha Cas ee Turkiga, oo siday qiyaastii 800 tan oo gargaar ah — oo ay ku jiraan bustayaal, cuntooyinka aasaasiga ah iyo sahay kale oo muhiim ah — ayaa Jimcihii soo gaaray dekedda al-Arish ee Masar isaga oo u sii gudbayay Qaza.
Hay'adddu sidoo kale waxay maalin kasta siisaa 35,000 oo qof oo Qaza ku sugan cuntooyin karsan waxayna taageertaa isbitaallada iyo howlgallada caafimaad ee ay maamusho Bisha Cas ee Falastiin.
Xabbad-joojin u dhaxaysa Xamaas iyo Israa’iil ayaa jirtay tan iyo 10-kii Oktoobar, balse Israa’iil ayaa maalin kasta jebisa, taasoo sababtay dhibbanayaal badan oo Falastiiniyiin ah.
Tan iyo Oktoobar 2023, weerarrada Israa’iil ayaa dishay in ka badan 69,000 qof, oo u badan haween iyo carruur, dhaawacayna in ka badan 170,000 qof kale, waxayna ka dhigeen goobta mid aan ku habboonayn in lagu noolaado.
Erdogan sidoo kale wuxuu sheegay in Turkigu uu dhiirrigelinayo nabad, caddaalad, xasillooni iyo barwaaqo wadaag ah xuduudaha koonfureed, laga bilaabo Ciraaq ilaa Suuriya.
