Madaxweynaha Jabuuti, Ismaaciil Cumar Geelle, ayaa si rasmi ah loogu caleemo saaray musharraxa xisbigiisa, Rassemblement Populaire pour le Progrès (RPP), ee doorashada Madaxtinimada ee Abriil 2026.
Caleemo saarka Madaxweynaha Jamhuuriyadda ayaa Sabtidii ka dhacay Qasriga Ummadda (Palais du Peuple), iyadoo uu halkaas ka socday shirweyne aan caadi ahayn oo uu lahaa xisbiga RPP, oo ah xisbiga ugu weyn ee siyaasadda dalkaas.
Dadweyne ka kala yimid dhammaan xaafadaha caasimadda iyo gobollada dalka, ayaa isugu soo baxay bannaanka Qasriga Ummadda si ay u muujiyaan sida ay si qoto dheer ugu xiran yihiin inuu sii socdo hoggaanka Madaxweyne Ismaaciil Cumar Geelle.
Khudbad uu ka jeediyay madasha, Madaxweynuhu wuxuu sheegay inuu si wanaagsan uga jawaabay codsiga xisbigiisa ee ahaa inuu noqdo musharraxooda doorashada madaxtinimo ee soo socota.
"Waqtiyadii u dambeeyay, waan maqlayay. Waan dhegaysanayay. Waan daawanayay. Waan ka fikirayay. Golaha Odayaasha, abaabulka haweenkeena, baaqa dhallinyaradeena iyo shaqaalaheena," ayuu yiri Madaxweyne Geelle, isagoo sheegay inuusan "dhegaha ka fureysan karin oo uusan dareen la'aan ka noqon karin qayladaas guud ee meel walba ka yeeraysay.".
"Qayladaas, waa baaqa qarankeena oo aanan ka baxsan karin. Waa waajib iyo waddaniyad," ayuu yiri Madaxweynuhu, isagoo muujiyay "dareen weyn oo ka dhashay kalsoonida iyo qaddarinta" ee mar kale lagu siiyay. "Doorashadiina aad igu magacawdeen musharraxa xisbigeena way i sharafaysaa, aad ayayna ii taabatay," ayuu raaciyay Madaxweynuhu.
Dhinaca kale, Madaxweyne Geelle wuxuu si weyn uga faa'iideystay madashan inuu hoosta ka xarriiqo sida uu uga warqabo in hoggaaminta arrimaha qaranku ay u baahan tahay, maanta in ka badan sidii hore, adkeysi iyo aragti fog, marka la eego isbeddellada qootada dheer ee dunida iyo caqabadaha cusub ee soo baxaya.
"Waxaan ku nool nahay xilli ay tallaabooyinka maxalliga ahi saameyn caalami ah dhalin karaan... halkaas oo istiraatiijiyadaha juquraafi-siyaasadeed ay isku dhacayaan... halkaas oo hamigii dagaal oognimadu uu dib u soo cusboonaanayo... halkaas oo dhibaatada cimiladu ay khatar ku tahay," ayuu yiri Madaxweyne Geelle, isagoo intaas ku daray in qaranku uu horey u caddeeyay awoodda uu u leeyahay inuu ka gudbo caqabado aad u waaweyn.
Madaxweynuhu wuxuu dib u xaqiijiyay "aaminaadda uu ku qabo awoodda qarankeena ee ah in la ilaaliyo guulaha la gaaray lana sii wado socodka aan leex-leexadka lahayn ee dhinaca horumarka", isagoo ku celiyay in mustaqbalka lagu wajihi doono "si buuxda oo looga soo horjeedo qabyaaladda iyo kuwa buunbuuninaya sawirka taban ee dalkeena.".
Marka laga soo tago xisbiga RPP, waxaa sidoo kale shirweynahaasi ka soo qaybgalay xisbiyada kale ee ay isbahaysiga ku yihiin Isbahaysiga Madaxtooyada ee (UMP), sida FRUD, PND, PSD, iyo UPR. Waxay sidoo kale taageereen in Madaxweynuhu uu noqdo musharraxa isbahaysigooda ee doorashada Abriil 2026.
Musharraxnimada Madaxweyne Geelle ayaa heshay sharciyad qaran oo ballaaran markii uu taageero ka helay Ururka Dimuqraadiyadda iyo Caddaaladda (UDJ), oo ah xisbiga ugu weyn mucaaradka dalka.
Marwada Koowaad ahna Guddoomiyaha Ururka Qaran ee Haweenka Jabuuti (UNFD), Marwo Kadra Maxamuud Xayd, oo ah shaqsi caan ka ah dalka, hormuudna ka ah ilaalinta midnimada iyo horumarka qaranka, ayaa iyaduna ka soo qaybgashay munaasabaddan.
