Saraakiil ka tirsan Ciidanka Xoogga Dalka Soomaaliyeed ayaa ka qalinjabiyay tababar heer sare ah oo socday muddo hal sano ah laguna qabtay dalka Uganda, waxaana munaasabadda qalinjabinta rasmiga ah hoggaaminayay Madaxweynaha Uganda, Mudane Yoweri Museveni.
Munaasabadda qalinjabinta waxaa ka qaybgalay wafdi heer sare ah oo ka socday Dowladda Federaalka Soomaaliya, oo ay hoggaaminaysay Safiir Fardowsa Maxamed Qanyare, Danjiraha Soomaaliya ee Uganda.
Sidoo kale, waxaa goobta joogay saraakiil sare oo ka tirsan Ciidanka Xoogga Dalka Soomaaliyeed (CXDS), oo ay ku jiraan Gaashaanle Sare Axmed Ciise, Taliyaha Tababarka CXDS, iyo Gaashaanle Sare Cali Aadan Shuriye, Taliyaha Habmaamuuska CXDS.
Saraakiisha Soomaaliyeed waxay ka mid ahaayeen ciidan caalami ah oo ka kooban 498 sarkaal oo ka kala socday dalal dhowr ah oo Afrikaan ah, sida Uganda, Tanzania, Mali, Jamhuuriyadda Bartamaha Afrika (CAR), iyo Soomaaliya.
Munaasabaddan waxay muujisay doorka muhiimka ah ee Dowladda Uganda ay ka ciyaarayso dib-u-dhisidda iyo tababaridda Ciidanka Xoogga Dalka Soomaaliyeed, iyadoo Uganda ay tahay saaxiib istaraatiiji ah oo bixiya tababaro, xirfad-dhisid, iyo aqoon-isweydaarsi si loo xoojiyo awoodda amni ee Soomaaliya.
