Ra’iisul Wasaaraha Jamhuuriyadda Federaalka Soomaaliya, Mudane Xamse Cabdi Barre, ayaa ka qeybgalay daahfurka adeegyada Xajka ee sannadkan 1447/2026 iyo soo gunaanadka Xajka sannadkii hore ee 1446 H.
Ra’iisul Wasaaraha ayaa tilmaamay horumar ballaaran oo laga gaaray hufnaanta adeegyada, isagoo xusay in Soomaaliya ay kaalin hormuud ah ka gashay dalalka bixiya daryeel heer sare ah oo loo sameeyo xujeyda.
Ra’iisul Wasaaruhu wuxuu aqoonsaday caqabadihii hore ee ka dhashay dib-u-habeynta adeegyada, oo ay ka mid ahayd iska-caabin ka timid meelo kala duwan, balse wuxuu ammaanay go’aannadii adkaa ee dowladdu qaadday si looga gudbo caqabadahaas.
Wuxuu ugu baaqay culimada Soomaaliyeed inay xujeyda horay u siiyaan tilmaamo iyo wacyigelin ku saabsan manaasikta iyo marinnada Xajka, si loo hubiyo gudashada waajibaadka diineed ee saxda ah. Waxa kale oo uu faray Wasaaradda Awqaafta iyo Arrimaha Diinta inay culimada aqoonta u leh iyo shaqaalaha caafimaadka oo kaliya u oggolaato inay caawiyaan xujeyda.
Ra’iisul Wasaare Xamse ayaa ku ammaanay Wasaaradda Awqaafta iyo Arrimaha Diinta guulaha la gaaray, isagoo carrabka ku adkeeyay in guulahaasi ay ka tarjumayaan horumarka Soomaaliya ee dhinacyada maamulka, adeegyada bulshada iyo horumarka waara.
