Kooxda gargaarka caalamiga ah ee loogu magac daray "Sumud" oo gargaar u sida Qaza ayaa gaartay meel ku dhow waqooyiga Marsa Matrouh oo ku taalla xeebta badda Mediterranean-ka ee Masar, sida ay ku dhawaaqeen qabanqaabiyeyaasha safarka.
Waxaa la filayaa in markabka uu saacado gudahood u sii gudbo biyaha waqooyi ee magaalada Alexandria, sida ay Axaddii barta X ku sheegeen Guddiga Caalamiga ah ee Jebinta Cunaqabateynta Qaza.
"Weerar ayaan ka filanaynaa Sahyooniyadda waqti kasta maadaama aan ku sii dhowaaneyno Qaza," ayay raaciyeen.
Dhanka kale, Flotilla Sumud ayaa sheegtay: "Markabkeena hogaaminaya, OHWAYLA iyo ALL IN, waxay hadda 678 kiiloomitir u jiraan Qaza, waxaana la filayaa inay ku gaaraan 3 ilaa 4 maalmood gudahood. Flotilla-du waxay hadda ka kooban tahay 44 markab, iyadoo dhowaan lagu soo daray laba doonyood oo cusub oo ku soo biiray safarka."
Waxay intaas ku dareen in "laba maalmood gudahood, flotilla ay geli doonto aag khatar sare leh. Go'aankayagu waa mid adag, balse hadda ayaan ugu baahi badannahay taageeradiina caalamiga ah iyo feejignaantiina."
Horey ayuu guddigu u sheegay inay diyaarinayaan doon qaadi doonta saxafiyiin iyo xirfadlayaal caafimaad oo u socda Qaza oo ku jirta cunaqabateynta Israa’iil.
Bayaan ay soo saareen, waxay sheegeen in doonta, oo la filayo inay baxdo 1-da Oktoobar, ay qaadi doonto in ka badan 100 shaqaale warbaahineed iyo dhakhaatiir caalami ah.
Kanaalka warbaahinta dadweynaha KAN ee Israa’iil, ayaa sheegay in Israa’iil ay isku diyaarineyso inay joojiso oo ay gacanta ku dhigto doonta flotilla, taasoo la filayo inay gaarto xeebaha Qaza afar maalmood gudahood, iyadoo ku beegan ciidda Yom Kippur ee Yuhuudda.
Haddii la fuliyo, howlgalka la filayo ee Israa’iil wuxuu noqon doonaa mid la mid ah joojinta doonyaha Madleen iyo Handala ee gargaarka bini'aadantinimo ee bilihii Juun iyo Luulyo.
Doonta Flotilla waxay safarkeeda bilowday horaantii bishan si ay u jebiso cunaqabateynta Israa’iil ee Qaza oo ay u gaarsiiso gargaar bini'aadantinimo, gaar ahaan agabka caafimaadka.
Tan iyo 2-dii Maarso, Israa’iil waxay gabi ahaanba xirtay xuduudaha Qaza, iyadoo joojisay sahayda cuntada iyo gargaarka, taasoo sii xoojisay xaaladaha macluusha ee deegaankaas.
Israa’iil ayaa lagu yaqaan horjoogsiga doonyaha u socda Qaza, iyadoo qabsata doonyahaas oo masaafurisa dadka u ololeeya xuquuqda aadanaha ee la socda, taasoo lagu tilmaamay fal burcad-badeednimo.
Ciidamada Israa’iil ayaa dilay in ka badan 66,000 oo Falastiiniyiin ah, oo u badan haween iyo carruur, tan iyo Oktoobar 2023. Duqeymaha joogtada ah ayaa ka dhigay Qaza meel aan la degi karin, iyadoo keentay macluul iyo faafitaanka cudurrada.
