Dowladda Federaalka Soomaaliya ayaa kordhinaysa dadaalladeeda ku aaddan xasillinta iyo isgaarsiinta, iyadoo dhawaan xarunta Wasaaradda Arrimaha Gudaha lagu qabtay kulan heer sare ah oo ay yeesheen Guddiga Farsamo ee Arrimaha Xasillinta. Kulanka waxaa guddoomiyey Wasiirka Arrimaha Gudaha, Federaalka iyo Dib-u-heshiisiinta, Xildhibaan Cali Yuusuf Cali-Xoosh.

Kulanka ayaa diiradda lagu saaray qodobo muhiim ah, oo ay ku jiraan xoojinta isku-duwidda hawlaha xasillinta iyo mideynta fariimaha dowladda ee dagaalka ka dhanka ah Khawaarijta. Waxaa si gaar ah loo adkeeyey muhiimadda ay leeyihiin baahiyaha iyo mudnaanta deegaannada dhowaan laga xoreeyey kooxdaas.

Kulanka waxaa warbixin guud ka bixiyey La-taliyaha Siyaasadda ee Wasaaradda iyo Isku-duwaha Xasillinta, iyagoo soo bandhigay horumarka ilaa hadda la gaaray, caqabadaha jira iyo dadaallada socda. Fursaddan ayaa u saamaxday agaasimayaasha isgaarsiinta dowladda inay mideeyaan fariimahooda bulshada, isla markaana ay xoojiyaan mowqif mideysan oo taageera qorshaha guud ee xasillinta dalka.

Xubnaha guddiga ee ka socday wasaaradaha iyo hay’adaha federaalka ayaa soo jeediyey warbixin ku saabsan hawlahooda xasillinta iyo istiraatiijiyadaha lagu heli karo maalgelin dheeraad ah mustaqbalka. Wasiir Cali Yuusuf Cali-Xoosh ayaa ammaanay shaqadooda, isagoo ugu baaqay inay dardar geliyaan isku-duwidda. Wuxuu ku adkeeyey muhiimadda joogteynta farriimaha guusha iyo xoreynta ee lagu dhiirri-gelinayo horumar iyo xasillooni deegaannada cusub.

Guddiga Farsamo oo la aas-aasay Janaayo 2024, lana hoosgeeyey Wasaaradda Arrimaha Gudaha, ayaa door muhiim ah ka ciyaaray mideynta istiraatiijiyadda isgaarsiinta dowladda ee ka dhanka ah Al-Shabaab. Dadaalladiisa ayaa horseeday in la ballaariyo awoodda dowladda, iyadoo warbixinno ka imanaya magaalooyinka laga xoreeyey kooxdu ay muujinayaan taageero ballaaran oo bulshada u hayaan isbeddelada togan iyo joogitaanka dowladda.