Dalka Nigeria ayaa laga soo sheegayaa in tirada dadka u dhintay qandhada Lassa, oo ka gudba xoolaha una gudba dadka, ay gaartay 151 qof.
Bayaan kasoo baxay Xarunta Xakamaynta Cudurrada ee Nigeria ayaa lagu sheegay in laga digayo kororka kiisaska Lassa ee laga diiwaan geliyay dalka tan iyo bishii Janaayo.
Warbixinta ayaa xustay in laga soo bilaabo 1-dii Janaayo illaa hadda la xaqiijiyay 800 oo xaaladood oo Lassa ah, iyadoo tirada dadka u dhintay fayraska Lassa ay korodhay ayna gaadhay 151 qof.
Sidoo kale, waxaa la sheegay in heerka dhimashada Lassa uu kordhay marka loo barbar dhigo sannadkii hore isla waqtigan, isagoo ka baxay boqolkiiba 17.3% gaareyna 18.9%.
Sannadkii hore, 190 qof ayaa guud ahaan dalka ugu geeriyooday qandhada Lassa.
Dowladda Nigeria ayaa 23-kii Janaayo 2019 ku dhawaaqday xaalad degdeg ah sababo la xiriira faafitaanka cudurka Lassa.
Xanuunka Lassa oo ka dhaca dalal badan oo Afrikaan ah sida Mali, Togo, Ghana, Liberia, iyo Sierra Leone, ayaa markii ugu horreysay laga helay Nigeria sanadkii 1969-kii, gaar ahaan gobolka Borno ee waqooyi-bari dalkaas.
Cudurkan oo uu sababo la falgalka saxarada jiirka ayaa sidoo kale si toos ah uga gudbi kara qof ilaa qof, wuxuuna sababi karaa xummad dhiig-bax keenta oo halis ah.
Mas’uuliyiintu waxay shacabka uga digeen in ay ka fogaadaan la falgalka jiirka iyo xayawaannada kale ee gurguurta.
