Wasaaradda Shaqada iyo Arrimaha Bulshada ee Xukuumadda Federaalka Soomaaliya ayaa lagu qabtay xafladda xil-wareejinta.
Ra’iisul Wasaare Ku-xigeenka Xukuumadda, Mudane Saalax Axmed Jaamac, ayaa si rasmi ah xilka ugu kala wareejiyay Wasiirka cusub, Mudane Saalim Caliyow Ibrow, iyo Wasiirkii hore, Mudane Yuusuf Maxamed Aaden.
Xil-wareejintan ayaa timid kadib markii Wasiir Saalim Caliyow Ibrow loo dhaariyay xilka Wasiirka Shaqada iyo Arrimaha Bulshada ee Xukuumadda, taas oo ka dhacday kulan aan caadi ahayn oo ay yeesheen Guddiga Joogtada ah ee Baarlamaanka Soomaaliya.
Magacaabista Wasiirka cusub waxaa sameeyay Ra’iisul Wasaaraha Soomaaliya, Xamza Cabdi Barre, Isniintii, Oktoobar 27, iyadoo la qaddarinayo mas'uuliyadaha culus ee wasaaradda.
Ra'iisul Wasaare Ku-xigeenka, Mudane Saalax Axmed Jaamac, ayaa khudbadiisa ku tilmaamay in Wasaaradda Shaqada iyo Arrimaha Bulshada ay ka mid tahay Wasaaradaha ugu muhiimsan Qaranka.
Wuxuu u rajeeyay Wasiirka cusub inuu si guul leh u dhammaystiro qorshooyinka Xukuumadda DanQaran ee ku aaddan horumarinta arrimaha bulshada.
Saalax waxa uu si gaar ah u xusay in Wasaaraddu ay qayb weyn ka qaadan doonto shaqo abuurka dhallinyarada, taas oo ah tiir u ah horumarinta dhaqaalaha, amniga, iyo dib-u-dhiska dalka.
Saalax wuxuu sidoo kale u mahad celiyey Wasiirkii hore, Yuusuf Maxamed Aaden, sidii xilkasnimada lahayd ee uu ugu adeegay Soomaaliya muddadii uu xilka hayey, wuxuuna Alle (SWT) uga baryay Wasiirka cusub inuu u fududeeyo masuuliyadda adag ee loo igmaday.
Wasiirka cusub, Prof. Saalim Caliyow Ibrow, waxa uu xilkan ku yimid khibrad ballaaran. Waa siyaasi ruug-caddaa ah oo Baarlamaanka ka tirsanaa tan iyo sanadkii 2000, isagoo soo qabtay jagooyin sarsare oo ay ka mid yihiin Ra’iisul Wasaare Ku-xigeen iyo Wasiir wasaarado muhiim ah intii u dhaxaysay 2000-meeyadii ilaa 2015.
Wasiirkii hore, Yuusuf Maxamed, ayaa hore farriin hambalyo ah u soo dhigay boggiisa Facebook, isagoo u mahadceliyay hoggaamiyeyaasha qaranka fursaddii uu u helay inuu u adeego dalka, wuxuuna Prof. Saalim ugu hambalyeeyay xilka, isagoo u rajeeyay guul.
Xil-wareejintani waxay calaamad u tahay bilowga waajibaadkii cusbaa ee wasaaradda, iyadoo diiradda lagu saarayo horumarinta shaqaalaha, shaqo abuurka, iyo daryeelka bulshada.
