Bannaanbaxyo ay dhallinyaro hoggaaminayaan oo looga dalbanayo waxbarasho iyo daryeel caafimaad oo tayo leh oo ka socday dalka Marooko ayaa isku beddelay iska hor-imaadyo rabshado wata oo dhexmaray iyaga iyo ciidamada ammaanka, iyadoo ay tahay maalintii afraad oo xiriir ah oo ay dibadbaxyadu ka socdaan dhowr magaalo.
Bannaanbaxyadan ayaa si aan habaysnayn looga soo agaasimay baraha internet-ka, iyadoo la isticmaalay aaladaha TikTok, Instagram iyo Discord.
Magaalooyinka koonfureed ee Tiznit, Inzegane, iyo Ait Amira, iyo sidoo kale magaalada bari ku taalla ee Oujda, iyo Temara oo u dhow caasimadda Rabat, boqolaal dibadbaxayaal da'yar ah ayaa dhagxaan ku tuuray ciidamada ammaanka oo isku dayayay inay kala eryaan iskusoo baxyada.
Magaalada Ait Amira, muuqaallo ay baahiyeen warbaahinta maxalliga ah ayaa muujiyay dibadbaxayaal oo rogay oo burburiyay dhowr gaari oo boolis ah, ayna dab qabadsiiyeen bangi.
Magaalada Inzegane, muuqaallo lagu baahiyay baraha bulshada ayaa muujinayay dibadbaxayaal afka soo duubtay oo dab qabadsiinaya bangi, halka qaar kalena ay la dagaallamayeen booliska oo adeegsanayay biyo-tuuryo.
Xarig iyo Cambaareyn
Magaalada Rabat, booliska ayaa xiray tobanaan dhallinyaro ah xilli ay isku dayayeen inay ku dhawaaqaan hal-ku-dhegyo ka dhan ah musuqmaasuqa.
Ururka Xuquuqda Aadanaha ee Marooko (AMDH) ayaa sheegay in 37 dhallinyaro ah dammaanad lagu sii daayay, iyadoo baaritaan uu ku socdo. Hakim Saikuk, oo ah madaxa laanta AMDH ee Rabat, ayaa ku cambaareeyay xariggaas inuu yahay mid dastuurka ka soo horjeeda.
Isbahaysiga dowladda ayaa Talaadadii soo saaray bayaan ay ku muujinayaan "sida ay diyaar ugu yihiin inay wada-hadal la galaan dhallinyarada si loo helo xalal macquul ah." Waxay sidoo kale ammaaneen waxa ay ugu yeereen "falcelinta isku dheellitiran ee mas'uuliyiinta amniga."
Wasaaradda Arrimaha Gudaha lagama helin faahfaahin dheeraad ah oo ku saabsan dhacdooyinkan.
