Madaxweynaha Turkiga Recep Tayyip Erdogan ayaa cambaareeyay waxa uu ku tilmaamay "fal burcadnimo" oo ay Israa’iil kula kacday safarka bini’aadantinimo ee Kolonyada Sumud oo ku wajahnaa Qaza si ay gargaar u gaarsiiyaan Falastiiniyiinta la dulmiyay.
Erdogan ayaa sheegay in weerarka Israa’iil ku qaaday dad rayid ah oo ku sugnaa biyaha caalamiga ah uu caddeynayo in "mashiinka xasuuqa uu ku jiro xaalad waalli ah si uu u qariyo dambiyada uu ka wado Qaza," sida uu ka sheegay khudbad uu Khamiistii ka jeediyay kulanka madaxda gobollada ee xisbiga Cadaaladda iyo Horumarka (AK).
"Xukuumadda xasuuqa wadda ee Netanyahu ma xamili karto xitaa fursad yar oo nabad ku dhalato," ayuu Erdogan sii raaciyay.
Madaxweynaha Turkiga ayaa sidoo kale sheegay in "safarka Kolonyada Sumud ee caalamiga ah uu mar kale dunida tusay xadgudubyada ka socda Qaza iyo wejiga xasuuqa ee Israa’iil."
Wuxuu intaas ku daray: "Ma dayici doonno walaalaheenna Falastiiniyiinta ah, waxaana ku dadaali doonnaa awooddeenna oo dhan in la gaaro xabbad-joojin iyo inaan soo celinno nabadda."
Mas’uuliyiinta Turkiga ayaa la socota xaaladda waxayna qaadayaan tallaabooyin lagu hubinayo in muwaadiniinta saaran doomaha Kolonyada Sumud aysan waxyeello soo gaarin, sida uu Erdogan sheegay.
