Ciidamada ammaanka ee Dowladda Federaalka Soomaaliya ayaa si buuxda u soo afjaray weerar argagixiso oo lagu qaaday xarunta dembi-baarista Godka Jilicow, oo ka mid ah xarumaha waaweyn ee Hay’adda Sirdoonka iyo Ammaanka Qaranka (NISA).
Weerarkan ay kooxda Al-Shabaab soo maleegeen ayaa si degdeg ah loo fashiliyey, iyadoo toddobadii dagaalyahan ee weerarka soo qaaday la dilay daqiiqado gudahood, sida ay sheegeen masuuliyiinta ammaanku. Weerarka ayaa loo adeegsaday gaari nooca cabdi-bilaha ah oo lagu rinjiyeeyay midabbada iyo astaanta ciidamada ammaanka, iyagoo xirnaa dhar ciidan si ay isu qariyaan.
Mas’uuliyiintu waxay sheegeen in dhacdadan ay muujineyso baahida degdegga ah ee lagu adkeynayo xakamaynta gaadiidka leh midabbada ciidamada ee ku dhex socda caasimadda.
Dhanka kale, hay’adaha ammaanka ayaa lagu amray inay si buuxda u fuliyaan Xeerka Ammaanka Xarumaha Dowladda (Lambarka 134), Xeerka Ammaanka Xarumaha Gaarka loo leeyahay (Lambarka 135), iyo Xeerka Xakamaynta Hubka ee Caasimadda (Lambarka 123).
Ugu dambeyn dawladda ayaa tacsi u dirtay ehellada geesiyaashii ku shahiiday weerarka, iyadoo u rajeeysay saraakiisha dhaawacantay caafimaad degdeg ah.
