Madaxweynaha Turkiga, Recep Tayyip Erdogan, ayaa Sabtidii soo dhoweeyay jawaabta togan ee ururka Xamaas uu ka bixiyay qorshe nabadeed oo uu soo jeediyay Madaxweynaha Mareykanka, Donald Trump.
"Xamaas waxay caddeysay, sida ay marar badan oo hore samaysay, inay diyaar u tahay nabadda. Sidaas darteed, waxaa furmay daaqad fursad ah oo horseedi karta nabad waarta oo ka dhalata gobolkeenna," ayuu yiri Madaxweyne Erdoğan oo ka hadlayay munaasabad ka dhacday Istanbul.
Erdogan wuxuu adkeeyay in Turkigu uu adeegsanayo dhammaan awooddiisa, laga soo bilaabo gargaarka bini'aadannimo ilaa dadaallada diblomaasiyadeed, si looga hortago dhibaato dheeraad ah ee dadka rayidka ah ee Qaza uga imaanaysa dagaalka xasuuqa ah ee Israa’iil.
Wuxuu xusay inuu Golaha Guud ee Qaramada Midoobay ku soo bandhigay dhibaatada carruurta Qaza isagoo adeegsanaya muuqaallo, uuna si faahfaahsan Madaxweyne Trump ugala hadlay dhibaatada bini'aadannimo.
"Rakaabka rajada"
Ankara waxay ka mid ahayd dhinacyada ugu waaweyn ee fududeynayay wadahadallada xabbad-joojinta ee u dhexeeya Israa’iil iyo ururka Xamaas.
Madaxweyne Erdogan ayaa sidoo kale ku dhawaaqay qorshaha Turkiga ee ah in la soo dhoweeyo "rakaabka rajada" ee ka socda Kolonyadii Caalamiga ahayd ee Sumud, oo ahayd hindise gargaar bini'aadannimo oo lagu taageerayo Qaza.
Wuxuu ugu baaqay dhammaan dhinacyada inay si mas'uuliyad leh u dhaqmaan, isagoo sheegay in qorshaha xabbad-joojinta Qaza uu joojin karo dhiigga daadanaya haddii si wax-ku-ool ah oo aan dib-u-dhac lahayn loo hirgeliyo.
Erdogan wuxuu carrabka ku adkeeyay in joojinta degdegga ah ee weerarada Israa’iil ay tahay arrin muhiim ah, isagoo ka digay "inaanay marnaba lumin rajada nabadeed ee soo ifbaxaysa." Mawduuca Qaza wuxuu ahaa qodobka ugu weyn ee wadahadal taleefan oo dhowaan dhexmaray Erdogan iyo Trump, kaas oo Trump uu ku muujiyay taageeradiisa xabbad-joojinta.
