Ra’iisul Wasaaraha Jamhuuriyadda Federaalka Soomaaliya, Mudane Xamse Cabdi Barre, ayaa Talaadadii daahfuray Shirweynaha Maamulka Internet-ka Soomaaliya 2025 (SIGF 2025), oo ah sannadkii saddexaad ee shirkan lagu qabto magaalada Muqdisho.
Isagoo ka hadlayay munaasabadda furitaanka, Ra’iisul Wasaaruhu wuxuu adkeeyay muhiimadda midnimada qaranka, wuxuuna carrabka ku dhuftay baahida loo qabo nidaam wadaag ah oo maamulka dijitaalka ah ah si loo sameeyo siyaasad dhijitaal oo mideysan oo shacabka oo dhan anfaca. Wuxuu shirkadaha internet-ka ugu baaqay inay bulshada u fududeeyaan helitaanka adeegyada, isla markaana ay ka fogaadaan tartan aan caafimaad qabin oo carqaladeyn kara horumarka guud ee dalka.
“Shirka Maamulka Internet-ka waa inuu soo saaraa natiijooyin wax ku ool ah oo lagu soo bandhigi karo doodaha tignoolajiyada caalamiga ah. Dalalka kale internet-ka waa la nidaamiyaa—lama isticmaali karo iyada oo aan sharci jirin. Waxaa jira sharciyo lagu ciqaabo kuwa ku xadgudba. Nasiib darro, dadkeenna waxay internet-ka u isticmaaleen si ka duwan adduunka intiisa kale, waana waajibkeenna inaan saxno arrintaas,” ayuu yiri Ra’iisul Wasaaruhu.
Sidoo kale, munaasabadda ayaa waxaa khudbado ka jeediyay Wasiiru-Dowlaha Wasaaradda Isgaarsiinta iyo Tiknoolajiyada, Maareeyaha Guud ee Hay’adda Isgaarsiinta Qaranka, iyo mas’uuliyiin kale oo ammaanay horumarka laga sameeyay dhanka kaabayaasha dijitaalka iyo maamulka internet-ka.
Shirka waxaa kasoo qaybgalay wakiillo ka kala socday dowladda, shirkadaha isgaarsiinta, jaamacadaha, bangiyada, iyo ururada bulshada rayidka ah.
Shirweynaha Maamulka Internet-ka Soomaaliya (SIGF) waa madal sannadle ah oo si wadajir ah u abaabulaan hay’adaha dowladda, shirkadaha gaarka loo leeyahay, jaamacadaha, iyo bulshada rayidka ah, si ay uga wada hadlaan maamulka internet-ka iyo isbeddelka dhijitaalka ah ee dalka, iyadoo la xoojinayo iskaashiga iyo wacyigelinta dadweynaha ee horumarka dhijitaalka Soomaaliya.
