Golaha Midowga Yurub ayaa Isniintii ku dhawaaqay in cunaqabateyntan, oo hore loogu talagalay inay dhamaato bisha soo socota, la kordhiyey ilaa 10-ka Oktoobar 2026.
Hadda, waxaa cunaqabateyntan ku jira 10 shaqsi iyo 8 hay’adood, kuwaas oo wajahaya mamnuucid safar, xanibaad hantiyadeed, iyo mamnuuc in si toos ah ama dadban loogu gudbiyo dhaqaale iyo kheyraad dhaqaale.
Cunaqabateyntu waxay si gaar ah u beegsaneysaa xubno iyo taageerayaal ka tirsan ciidanka RSF (Rapid Support Forces) iyo ciidanka SAF (Sudanese Armed Forces), kuwaas oo dagaalkooda laba sano ee la soo dhaafay saameyn weyn ku yeeshay malaayiin rayid ah.
Midowga Yurub ayaa markii ugu horreysay dejiyey nidaamka cunaqabateynta ee gaar ah ee Suudaan bishii Oktoobar 2023, waxaana tan iyo markaas lagu daray tallaabooyin kale oo isdaba joog ah bishii Janaayo, Juun iyo Diseembar 2024, iyo sidoo kale Luulyo 2025.
Bayaan rasmi ah oo laga soo saaray ayaa lagu adkeeyey in Midowga Yurub uu sii wadi doono la shaqeynta beesha caalamka iyo adeegsiga qalabkiisa diblomaasiyadeed, oo ay ku jiraan cunaqabateyn, si loo dardargeliyo hannaan siyaasadeed oo loo dhan yahay oo ka tarjumaya rajada iyo rabitaanka shacabka Suudaan.
