Ra’iisul Wasaaraha Jamhuuriyadda Federaalka Soomaaliya, Mudane Xamse Cabdi Barre, ayaa guddoomiyay kulan heer sare ah oo lagu eegayay diyaar garowga ugu dambeeya ee doorashooyinka dowladaha hoose oo dhawaan la qaban doono.

Kulanka, oo ay ka qeyb galeen wasiirrada si toos ah ugu lugta leh habraaca doorashada, ayaa lagu dhageystay warbixin faahfaahsan oo uu bixiyay Guddoomiyaha Guddiga Madaxa-bannaan ee Doorashooyinka Qaranka iyo Soohdimaha, Cabdi Xakiim Axmed Xasan, kaas oo sheegay in diyaar garowgu meel wanaagsan marayo, isla markaana dhammaan adeegyada muhiimka u ah qabashada doorashada la dhameystiray.

Ra’iisul Wasaare Xamse ayaa ammaanay guddiga iyo wasaaradaha ka shaqeynaya arrimaha doorashada, isagoo adkeeyay in dowladda ay ka go’an tahay fulinta nidaamka qof iyo cod, oo ka mid ah ballanqaadyada qorshaha Dan Qaran. Wuxuu xusay in habraaca la bilaabi doono doorashooyinka golayaasha deegaanka ee Gobolka Banaadir.

Ra’iisul Wasaaruhu wuxuu mar kale xaqiijiyay in dowladda ay ka go’an tahay horumarinta hanaanka dimuqraadiyadda iyo xaqiijinta in shacabka ay si toos ah u doortaan wakiilladooda deegaanka.