Madaxweynaha Jamhuuriyadda Jabuuti, Ismaaciil Cumar Geelle, oo hoggaaminaya wafdi heer sare ah, ayaa ka qaybgalaya doodda guud ee kalfadhiga 80-aad ee Golaha Guud ee Qaramada Midoobay, kaas oo Talaadadii, 23-kii Sebteembar, si rasmi ah uga furmay magaalada New York.
Ka qaybgalka Madaxweynaha ayaa muujinaya sida ay Jabuuti uga go'an tahay inay codkeeda ka muujiso fagaaraha caalamiga ah, gaar ahaan kalfadhigan taariikhiga ah oo ku beegan sannad-guuradii 80-aad ee aasaaska Qaramada Midoobay.
Madaxweynaha ayaa halkaas u joogaa inuu soo bandhigo aragtida Jabuuti ee ku aaddan arrimaha waaweyn ee caalamka iyo kuwa khuseeya gobolka Geeska Afrika.
Madaxweyne Geelle ayaa magaalada New York ku leh kulamo muhiim ah, oo ay ka mid yihiin kulan uu la yeelanayo Xoghayaha Guud ee Qaramada Midoobay, António Guterres. Kulankaas ayaa looga hadli doonaa arrimaha ugu muhiimsan ee caalamiga ah.
Sidoo kale, Madaxweynaha Mareykanka, Donald Trump, ayaa qaban doona xaflad soo dhaweyn ah, taas oo ah fursad muhiim ah oo lagu xoojin karo iskaashiga iyo diblomaasiyadda caalamiga ah.
Doodda guud ee sannadkan oo ay guddoominayso Jarmalka Annalena Baerbock, ayaa waxaa ka qaybgalaya wakiillada 193-ka dal ee xubnaha ka ah Qaramada Midoobay.
Kalfadhiga ayaa diiradda lagu saari doonaa caqabadaha waaweyn ee caalamka sida dagaallada socda, isbeddelka cimilada, iyo arrimaha anshaxa ee la xiriira garaadka macmalka ah (AI), iyadoo halku-dheggiisu yahay "Wada-jir baan ku Wanaagsannahay."
Wafdiga ballaaran ee Madaxweynaha waxaa ka mid ah Wasiirka Arrimaha Dibadda, Cabdulqaadir Xuseen Cumar, Safiirka Jabuuti u fadhiya Maraykanka ahna Wakiilka Joogtada ah ee Qaramada Midoobay, Maxamed Siyaad Ducaale, iyo xubno kale oo muhiim ah.
