Madaxweynaha Mareykanka Donald Trump ayaa Arbacadii sheegay inuu bilaabi doono "ka shaqaynta" soo afjaridda dagaalka Suudaan, ka dib markii Amiirka Sacuudiga, Maxamed bin Salmaan, uu ka codsaday inuu ka caawiyo soo afjaridda colaadda.
Tan iyo markii uu ka qarxay Abriil 2023, dagaalka u dhexeeya ciidanka Suudaan iyo maleeshiyaadka RSF ayaa dilay tobanaan kun oo qof isla markaana barakiciyey ku dhawaad 12 milyan.
Washington ayaa ku boorrisay dhinacyada dagaalamaya inay dhameystiraan heshiiska lagu soo afjarayo dagaalka, halka wakiilka Trump u qaabilsan Afrika, Massad Boulos, uu Sabtidii u sheegay AFP in dagaalka Suudaan uu yahay "masiibada bini'aadantinimo ee ugu weyn caalamka". Haseyeeshee Trump ayaan si muuqata uga hadlin arrinta, isaga oo diiradda saaray dagaallada Qaza iyo Ukraine.
Trump ayaa ku celceliya sheegashadiisa ah inuu xalliyey siddeed khilaaf tan iyo markii uu xafiiska ku soo laabtay bishii Janaayo.
Ballanqaadkiisa ah inuu bilaabo ka shaqaynta soo afjaridda colaadda ayaa ka turjumaysa xiriirka dhow ee uu la leeyahay hogaamiyaha Sacuudiga, kaasoo uu ku martigeliyey Aqalka Cad Talaadadii.
