Madaxweynaha Mareykanka, Donald Trump, ayaa tilmaamay in la gaaray heshiis ku saabsan mustaqbalka TikTok, isagoo khadka telefonka kula hadlay Madaxweynaha Shiinaha, Xi Jinping. Sida ay wararku sheegayaan, saraakiisha Maraykanka iyo Shiinaha ayaa gaaray heshiis u oggolaanaya in TikTok uu ka sii shaqeeyo Maraykanka.
“Shirkii weynaa ee Ganacsiga ee ka dhacay Yurub ee u dhexeeyey Mareykanka iyo Shiinaha, si AAD U WANAAGSAN ayuu u dhacay! Goor dhow ayuuna soo gabagaboobayaa,” ayuu Trump ku qoray bartiisa bulshada ee Truth Social. Trump wuxuu sheegay in heshiis lala gaaray "shirkad gaar ah" oo dhalinyarada Mareykanku ay "aad u doonayeen inay badbaadiyaan." Madaxweynaha Mareykanka wuxuu saadaaliyay in dhalinyaradu ay "aad ugu farxi doonaan" natiijada, isagoo si dadban u xusay barnaamijka TikTok balse aan si toos ah u magacaabin.
Xoghayaha Khasnadda Mareykanka, Scott Bessent, ayaa xaqiijiyay "heshiiska TikTok" intii lagu guda jiray wareeggii afaraad ee wada-hadallada ee Madrid. "Madaxweyne Trump door ayuu ku lahaa arrintan, xalay ayaan wicitaan la yeelanay, waxaan ka helnay tilmaamo gaar ah oo aan la wadaagnay dhiggeena Shiinaha," ayuu Bessent ka sheegay Madrid Isniintii. "Hoggaamintiisa iyo saameynta uu leeyahay la'aantood, ma awoodneen inaan maanta heshiiskan gaarno."
Maamulka Trump ayaa qariyay magaca iibsadaha ay Mareykanku taageerayaan, inkastoo si weyn loo aaminsan yahay inay tahay koox uu hoggaaminayo guddoomiyaha fulinta ee shirkadda Oracle, Larry Ellison, sida ay sheegayaan warbaahinta Mareykanka.
Wada-hadallada Mareykanka iyo Shiinaha, oo sii soconaya ilaa Arbacada, ayaa ku socda xabbad-joojin canshuuraha badeecadaha Shiinaha laga keeno ah oo la kordhiyay ilaa bisha Nofeembar. Cashuur is-dhaafsi ah oo dhan 10% ayaa weli dhaqangal ah inta lagu jiro hakinta.
TikTok wuxuu wajahayaa mamnuucid dalka oo dhan ah oo ka timid Mareykanka, taasoo salka ku haysa walaac laga qabo amniga qaranka oo la xiriira suurtagalnimada in xogta lala wadaago Beijing.
Koongareeska Mareykanka wuxuu sannadkii 2024 meel mariyay sharci ay isku raaceen labada xisbi oo ku qasbaya ByteDance, oo ah shirkadda Shiinaha ee iska leh TikTok, inay iibiso laamaheeda Maraykanka marka la gaaro 17-ka Sebteembar – taasoo ah markii saddexaad ee uu Trump kordhiyo waqtiga kama dambaysta ah.
Wada-hadalladan ayaa ku soo beegmaya iyadoo la rajeynayo kulan dhex mari kara Trump iyo Xi inta lagu guda jiro shir-madaxeedka Iskaashiga Dhaqaalaha ee Aasiya iyo Baasifigga (APEC) ee bisha soo socota ka dhacaya Koonfurta Kuuriya.
Trump wuxuu horey heshiisyo ganacsi ula galay UK, Koonfurta Kuuriya, Japan iyo Midowga Yurub, iyo kuwo kale, isagoo weli wada-hadallo kula jira dalal kale oo badan.
