Dowladda Kanada ayaa amartay shirkadda Hikvision ee laga leeyahay Shiinaha inay joojiso dhammaan howlgallada ay ka waddo dalkaasi, sababo la xiriira amniga qaranka, kadib markii ay hay’adaha sirdoonka dib u eegis ku sameeyeen tallaabooyin badan oo laga qaaday.

Wasiirka warshadaha ee Kanada, Mélanie Joly, ayaa sheegtay in dowladdu ku amartay Hikvision – oo ah shirkad caan ku ah soo saarista kamaradaha amniga inay si buuxda u joojiso howlihii ay ka waday gudaha Kanada, iyadoo ku saleysay "khatarta ay u leedahay amniga qaranka."

Hikvision, oo sidoo kale loo yaqaan Hangzhou Hikvision Digital Technology Co., ayaa la kulantay cunaqabatayn iyo xayiraado dhowr ah oo uga yimid waddamada deriska la ah Kanada sida Mareykanka, tan iyo shantii sano iyo bar ee la soo dhaafay, taasoo salka ku haysa isticmaalka qalabkeeda ee gobolka ismaamulka ah ee Xinjiang Uighur ee Shiinaha.

“Dowladdu waxay go’aansatay in haddii Hikvision Canada Inc. ay sii waddo howlaheeda gudaha Kanada ay dhaawac u geysan karto amniga qaranka,” ayay tiri Joly mar ay warbaahinta la hadlaysay Jimcihii fiidkii.

Waxay intaas ku dartay in go’aankani lagu saleeyay natiijooyinka ka soo baxay tallaabooyin baaritaano dhowr ah oo ay fuliyeen laamaha amniga iyo sirdoonka dalka.

Hadalladeeda kama aysan muuqan tixraac toos ah oo ku saabsan dowladda Shiinaha, sidoo kalena looma caddeyn sida saxda ah ee ay Hikvision khatar ugu tahay amniga qaranka Kanada.

Shirkadda Hikvision, oo sheegata in ay tahay tan ugu weyn adduunka ee soo saarta qalabka kormeerka amniga muuqaalka, ayaa sannadkii hore sheegtay inay ka baxday qandaraasyo ay ku lahayd Xinjiang iyada oo loo marayo shan shirkadood oo hoos yimaada, kuwaas oo lagu daray liiska madow ee ganacsiga Mareykanka sanadkii 2023.

Dowladda Shiinaha ayaa si adag u beenisay dhammaan eedeymaha la xiriira xadgudubka xuquuqda aadanaha ee gobolkaas, iyadoo si joogto ah u dhaleeceysa shirkadaha go’aansada inay joojiyaan wax kala iibsiga ama xiriirka ganacsi ee la xiriira Xinjiang.

Sannadkii hore, Kanada ayaa sheegtay inay dib u eegis ku sameyneyso codsi ku saabsan in la saaro cunaqabatayn shirkadaha Shiinaha ee soo saara qalabka amniga, oo ay ka mid tahay Hikvision, kadib markii ururrada u dooda xuquuqda aadanaha ay shirkadahaasi ku eedeeyeen in ay gacan ka geystaan cadaadiska iyo kormeerka dadka ku nool gobolkaas.

Wasiir Joly waxay sidoo kale sheegtay in Kanada ay horay u mamnuucday iibka qalabka Hikvision ee loo isticmaalo waaxyaha iyo wakaaladaha dowladda, iyadoo lagu wado dib u eegis lagu sameynayo xarumaha dowladda si loo hubiyo in aan la adeegsan qalabka shirkadda mustaqbalka.

Waxay sidoo kale caddeysay in amarkan uusan saameyn doonin hawlaha shirkaddu ay ka waddo meel ka baxsan Kanada, balse ay "si adag ugu dhiirrigelineyso" shacabka Kanadiyaanka ah inay ka war hayaan go’aankan oo ay go’aanadooda u qaataan si waafaqsan.