Wafdi ballaaran oo ka socda Dowladda Federaalka Soomaaliya ayaa magaalada Montreal ee dalka Kanada uga qaybgalaya Shirka 42-aad ee Golaha Guud ee Hay’adda Duulista Rayidka Caalamiga ah (ICAO), kaas oo ah madasha ugu sarreysa ee lagu dejiyo siyaasadaha iyo heerarka caalamiga ah ee hagaya mustaqbalka duulista hawada adduunka.
Golaha Guud ee ICAO, oo ah hay'adda ugu awoodda badan Ururka, wuxuu kulmaa saddexdii sanaba hal mar si loo dejiyo siyaasadda guud ee saddexda sano ee soo socota.
Shirkan oo socon doona inta u dhaxaysa 23-ka Sebteembar iyo 3-da Oktoobar, waxaa isugu yimid in ka badan 2,000 oo hoggaamiye oo ka kala socda 193-ka dal ee xubnaha ka ah ICAO, shirkadaha diyaaradaha farsameeya ee ugu waaweyn sida Airbus iyo Boeing, iyo khubaro dhinaca amniga iyo farsamada duulista ah.
Wafdiga Soomaaliya oo uu hoggaaminayo Wasiiru-Dowlaha Wasaaradda Gaadiidka & Duulista Hawada Cabdikariim Cabdow Xeydar, ayaa ujeeddadiisu tahay inuu xoojiyo doorka Soomaaliya ee fagaarayaasha caalamiga ah.
Sida uu sheegay Maareeyaha Guud ee Hay’adda Duulista Rayidka Soomaaliyeed, Md. Axmed Macallin Xasan, ka qaybgalka shirkan wuxuu Soomaaliya u yahay "fursad muhiim ah, si loo xoojiyo xiriirka kala dhexeeya dalalka xubnaha ka ah ICAO, loona hormariyo adeegyada duulista rayidka ee dalka."
Dhaqdhaqaaqa wafdiga Soomaaliya kuma eka oo kaliya ka qaybgalka fadhiyada guud, balse waxay wadaan kulamo laba geesood ah oo muhiim ah oo lagu horumarinayo iskaashiga.
Kulamada ugu horreeya waxay la yeesheen dowladda Qatar, waxaana qorshaysan inay maalmaha soo socda kulamo la yeeshaan quwado waaweyn sida dalalka Mareykanka, Shiinaha, Panama, iyo dalal kale.
Shirweynahan 42-aad ayaa la filayaa inuu diiradda saaro arrimo xasaasi ah sida amniga duulista, hal-abuurka cusub ee farsamada, horumarinta kaabeyaasha garoomada, iyo iskaashiga caalamiga ah.
Soomaaliya oo si firfircoon uga qeyb qaadaneysa arrimaha duulimaadyada caalamiga ah ayaa muujineysa sida ay uga go’an tahay in ay dib u soo ceshato maqaamkeedii hore ee duulimaadyada caalamiga ah, iyadoo sidoo kale dadaal ugu jirta in ay la jaanqaaddo heerarka ugu sarreeya ee badqabka iyo amniga hawada.
