Wasiirka Arrimaha Dibadda Turkiga, Hakan Fidan, ayaa Isniinta magaalada Istanbul ku martigelin doona kulan looga hadlayo arrimaha Qaza, sida ay sheegeen ilo diblomaasiyadeed oo Turki ah.
Kulanka ayaa la filayaa inay isugu yimaadaan wasiirrada arrimaha dibadda ee dalalka Turkiga, Imaaraadka Carabta, Indonesia, Qatar, Pakistan, Sacuudi Carabiya, iyo Urdun.
Ilo-wareedyadu waxay Axaddii xuseen in dalalkan ay yihiin isla kuwii 23-kii Sebtembar la kulmay Madaxweynaha Maraykanka, Donald Trump, intii uu socday Shirka Golaha Guud ee Qaramada Midoobay.
Kulankan ayaa looga hadli doonaa horumarradii ugu dambeeyay ee xabbad-joojintii Oktoobar 10-keedii iyo xaaladda bini'aadantinimo ee ka jirta Qaza.
Wasiir Fidan ayaa la filayaa inuu si adag u cambaareeyo isku dayada Israa'iil ay ku abuurayso marmarsiiyo ay ku soo afjarayso xabbad-joojinta. Wuxuu ku nuux-nuuxsan doonaa in beesha caalamku ay waajib ku tahay inay mowqif adag ka istaagto falalka daan-daansiga ah ee Tel Aviv. Wuxuu kaloo hoosta ka xarriiqi doonaa muhiimadda ay leedahay in dalalka Islaamku ay isku dubbaridaan tallaabooyinkooda si xabbad-joojintu ay isugu beddesho nabad waarta.
Gargaar aan ku filnayn
Wasiir Fidan ayaa carrabka ku adkeyn doona in gargaarka bini'aadantinimo ee hadda galaya Qaza uu yahay mid aan ku filnayn, ayna Israa'iil ku guul-darraysatay inay ka soo baxdo waajibaadkeedii ku aaddanaa arrintan xasaasiga ah.
Isagoo ku adkaynaya in la xaqiijiyo gargaar bini'aadantinimo oo ku filan oo si joogto ah loo gaarsiiyo Qaza ay tahay lagama maarmaan bini'aadantinimo iyo mid sharci ah, wuxuu kaloo carrabka ku adkeyn doonaa in cadaadis la saaro Israa'iil sidii ay u fulin lahayd baahiyahan.
Waxaa la filayaa in Fidan uu ku adkeysto baahida loo qabo in si degdeg ah loo hirgeliyo qorshayaal u oggolaanaya Falastiiniyiinta inay la wareegaan mas'uuliyadda amniga iyo maamulka Qaza.
Tallaabadan waa in lagu ilaaliyaa xuquuqdooda sharciga ah, lagulana dhowrayaa aragtida xalka labada-dawladood.
Ilo-wareedyadu waxay intaa ku dareen in Wasiirku uu sidoo kale iftiimin doono muhiimadda ay leedahay in la sii wado la-tashiga iyo isku-duwidda dhow ee tallaabooyinka laga qaadayo fagaarayaasha Qaramada Midoobay.
