Shirkii 7-aad ee Madasha Garsoorayaasha Soomaaliyeed oo ka furmay Muqdisho
Madashan ayaa kaalin muhiim ah ka qaadata hagidda dib-u-habeynta, hagaajinta howlaha maxkamadaha, iyo xoojinta madax-bannaanida iyo waxtarka garsoorka.
Guddoomiyaha Maxkamadda Sare ee Soomaaliya, Garyaqaan Bashe Yuusuf Axmed, ayaa Muqdisho ka furay shirka Garsoorayaasha Soomaaliyeed, taas oo astaan u ah dadaallada socda ee lagu xoojinayo nidaamka cadaaladda dalka.
Shirka oo la qabto saddexdii biloodba mar, ayaa isu keena hoggaanka garsoorka si ay uga wada hadlaan baahiyaha garsoorayaasha dalka oo dhan, caqabadaha jira, iyo horumarka laga gaaray tayaynta hay’adaha cadaaladda.
Madashan ayaa kaalin muhiim ah ka qaadata hagidda dib-u-habeynta, hagaajinta howlaha maxkamadaha, iyo xoojinta madax-bannaanida iyo waxtarka garsoorka.
Ka qaybgalayaasha madashan ayaa waxaa ka mid ah guddoomiyeyaasha Maxkamadaha Gobolka iyo Racfaanka ee Gobolka Banaadir, wakiillo ka socda garsoorka Dowlad-goboleedyada, iyo garsoorayaal ka kala yimid heerar kala duwan oo dalka ah.
Shirka ayaa lagu wadaa inuu ku soo gabagaboobo talooyin wax ku ool ah oo lagu xoojinayo waxqabadka garsoorka iyo helitaanka cadaaladda guud ahaan Soomaaliya.