3 sarkaal oo ka tirsan Al-Shabaab oo lagu dilay howlgallo milatari oo laga fuliyey Soomaaliya
Wasaaradda Gaashaandhigga ayaa sheegtay in Maxamed Cabdi Maxamed Nuur, oo mas’uul ka ahaa weerarro badan oo ka dhacay gobolka Bakool, uu ka mid yahay saraakiishii lagu dilay howlgalka.
Ciidamada Xoogga Dalka Soomaaliyeed ayaa fuliyay howlgallo milatari oo isdaba joog ah oo ka dhacay gobollada Baay iyo Bakool, kuwaas oo lagu dilay xubno sare oo ka tirsan ururka Al-Shabaab, sida lagu sheegay war-saxaafadeed Axadii ka soo baxay Wasaaradda Gaashaandhigga.
Wasaaraddu waxay sheegtay in ciidamada Soomaaliya ay dileen Maxamed Cabdi Maxamed Nuur, oo loo yaqaan Goofoow, kaas oo ahaa sarkaal sare oo Al-Shabaab ah, laguna eedeeyay inuu qorsheeyay weerarro badan oo lagu beegsaday shacabka gobolkaas.
Goofoow ayaa lagu dilay howlgal qorshaysan oo ka dhacay deegaanka Abal, oo 21 kiiloomitir u jira magaalada Xudur ee xarunta gobolka Bakool, sida lagu sheegay bayaanka.
“Intii lagu guda jiray howlgalka, ciidamada waxay qabteen hub iyo dukumiintiyo muujinayay qorshayaal lagu carqaladeyn lahaa amniga iyo xasilloonida deegaanka,” ayaa lagu yiri war-saxaafadeedka.
Wasaaraddu waxay intaas ku dartay in howlgal kale oo gaar ah lagu dilay laba xubnood oo muhiim ah oo ka tirsan Al-Shabaab oo kala ahaa, Yaxye oo loo yaqaan Abu Khalid, oo ahaa abaabulaha weerarrada argagixisada, iyo Shariif Aamir, kaas oo dhaawac soo gaaray intii howlgalka socday, una dhintay dhaawacaas.
Warsaxaafadeedka ayaa lagu sheegay in Ciidamada Xoogga Dalka Soomaaliyeed ay sii wadi doonaan dagaalka ka dhanka ah argagixisada, iyadoo lagu adkeeyay in “aan meel ammaan ah loo oggolaan doonin argagixisada Al-Shabaab ama cidda taageerta.”
Wasaaradda Gaashaandhigga ayaa sheegtay in howlgallada amniga lagu xoojinayo ee ka socda dalka la sii ballaarin doono “illaa laga xoreeyo dhammaan gobollada Soomaaliya ee ay weli halista ku hayyaan argagixisada.”
Howlgalladan ayaa imaanaya maalmo kadib markii Soomaaliya ay shaacisay in 220 duqeymo lagu guuleystay ah lagu beegsaday ururka Al-Shabaab tan iyo bishii Febraayo ee sannadkan, halkaas oo lagu dilay 868 dagaalyahan.
Tan iyo dhammaadkii 2024, ciidamada dowladda iyo kuwa amniga ee maamulka Puntland ayaa kordhiyay duqeymaha cirka ee ka dhanka ah argagixisada, gaar ahaan gobollada koonfureed, bartamaha iyo gobolka Bari ee Puntland, iyagoo taageero ka helaya saaxiibbada amniga caalamka.
Bishii hore, duqeyn qorshaysan oo ka dhacday magaalada Bu’aale ee gobolka Jubbada Dhexe ayaa lagu dilay Maxamuud Cabdi Xamuud oo loo yaqaan Jacfar Gurey, oo ka mid ahaa aasaasayaasha ururka Al-Shabaab ahaana madaxa sirdoonka ee ururka.
Ururka Al-Shabaab ayaa in ka badan 16 sano waday dagaal ka dhan ah dowladda Soomaaliya, iyagoo si joogto ah u beegsada ciidamada amniga, masuuliyiinta dowladeed, iyo shacabka.